എല്ലാ മലയാളി ബ്ലോഗര്‍ക്കും സ്നേഹപൂര്‍‌വം!

23/12/07

എത്രയും പ്രീയമുള്ള ഓരോ മലയാളി ബ്ലോഗര്‍ക്കും കുടുംബാംഗങ്ങള്‍ക്കും,
എല്ലാര്‍ക്കും സുഖമല്ലേ?
ഇവിടെ ഞങ്ങളും സുഖായി ഇരിക്കുന്നു,
ബെനോയും അപ്പൂസും വീണ്ടുമൊരു സമ്മര്‍ അടിച്ചുപൊളിക്കാനുള്ള തയാറെടുപ്പിലാണ്.
പക്ഷേ നമ്മളൊക്കെ അടിച്ചുപൊളിച്ച വേനലവധിക്കാലത്തിന്റെ അയല്‍‌പക്കത്ത് വരുമോ അവരുടെ ഒക്കെ അടിച്ചുപൊളി, പാവങ്ങള്‍!

എല്ലാര്‍ക്കും ഒന്നെഴുതണമെന്ന് കരുതിയിട്ട് നാളേറെയായി, തിരക്കില്പെട്ടു പോവുന്നു എന്നത് ഒരു എക്സ്ക്യൂസ് അല്ലെന്ന് അറിയാം , എന്തുപെട്ടെന്നാണ് 2007 പോയത് , തിരിഞ്ഞു നോക്കുമ്പോ ജീവിതത്തില്‍ എന്തെല്ലാം പുതിയ കാര്യങ്ങള്‍ അല്ലേ? വീണ്ടും പുതിയ ഒരു വര്‍ഷം കൂടെ എത്തുകയായ്, പുതിയ ആഗ്രഹങ്ങളും കൂടെ ചെല റെസലൂഷനുകളും, ഇത്തവണയും ഒക്കെ നന്നായി നടക്കട്ടെ അല്ലേ?

ഇത് ഞാന്‍ പബ്ലീഷ് ചെയ്യുമ്പോഴേക്കും താമസിച്ചുപോവുമോ എന്നൊരു ഭയവും ഉണ്ടാര്‍‌ന്നു, ഞങ്ങള്‍ വീണ്ടും വീടൊന്നു മാറി, കല്യാണം കഴിഞ്ഞ് അഞ്ച് വര്‍ഷത്തിനുള്ളില്‍ എട്ടാം തവണയാണ് ഈ മാറ്റം. ഓരോ തവണയും മാറുമ്പോ ഇനി വയ്യേ ഇതു അവസാനത്തേതാണെന്ന് കരുതും , മുബൈയില്‍ ഒറ്റമുറി ഫ്ലാറ്റില്‍ കഴിഞ്ഞിരുന്നപ്പൊ ഉള്ള സൌകര്യം പോലും ഇല്ലാ ഈ മൂന്നു ബെഡ്‌റൂം വീടുകള്‍ക്ക് എന്ന് തോന്നിയാല്‍ പിന്നെ മാറാതിരിക്കുമൊ?

വീട് മാറുമ്പോ ഏറ്റവും വലിയ പ്രശ്നങ്ങളില്‍ ഒന്നാണ്, പിന്നെയുള്ള ഒരാഴ്ച ബോക്സുകള്‍ക്ക് ഇടയില്‍ താമസിക്കണം എന്നുള്ളത് മറ്റൊരു പ്രശ്നം സര്‍വീസുകളെല്ലാം റീ ഇന്‍സ്റ്റാള്‍ ചെയ്യുക എന്നുള്ളതും ആണ്, അങ്ങനെയങ്ങനെ അവസാനം കമ്പ്യൂട്ടെറും ഇന്റെര്‍‌നെറ്റും ഒക്കെ കിട്ടിവരുമ്പോഴേക്കും വീണ്ടും ഒരാഴ്ച, ക്രിസ്മസ്സ് അവധിക്കാലമായതിന്റെ തിരക്കൊട്ടും പറയാനുമില്ല.എന്തായാലും രണ്ടാഴ്ച ബ്ലോഗിലേക്കും എത്തി നോക്കാന്‍ കഴിഞ്ഞില്ലാ എന്തോരം നല്ല പോസ്റ്റുകള്‍ മിസ്സായോ എന്തോ?

ഒരരികീന്നു തീര്‍ക്കണം, പയ്യെത്തിന്നാല്‍ നേരം വെളുക്കുമ്പോഴേക്കും പായും തിന്നാമെന്നല്ലെ

എന്തായാലും പുതിയ കണക്ഷനൊക്കെ കിട്ടി വന്നപ്പോഴേക്കും ക്രിസ്മസ്സ് ദാന്നു വന്നതു പോലെയായി.
എനിക്കേറ്റവും ഇഷ്ടമുള്ള മാസമാണ് ഡിസെംബര്‍, എന്താ കാരണമെന്ന് ചോദിച്ചാല്‍ ഒരുപക്ഷേ ഈ ക്രിസ്മസ്സും ന്യൂ ഇയറും ഒക്കെ അടുത്ത് വരുന്നതാണോ അതോ ക്രിസ്മസ്സ് വെക്കേഷനു സ്വന്തം വീട്ടില്‍ വരാന്‍ കഴിഞ്ഞിരുന്നത് കൊണ്ടാണോ, ,ഇനിയും ഒരുപക്ഷേ പ്രഭാതങ്ങളിലുള്ള ആ കുഞ്ഞു കുളിരും , ചെറിയ നാളുകളില്‍ തണുപ്പുള്ള രാത്രിയില്‍ ക്രിസ്മസ്സ് കാരളുകളില്‍ ക്രിസ്മസ്സ് വിളക്കും തൂക്കി ചെറിയ സംഘത്തോടും പാട്ടും പാടി വീടുകള്‍ തോറും കയറിയിറങ്ങി നടന്നതിന്റെ നോസ്റ്റാള്‍ജിയായാണോ എന്നൊന്നും അറിയില്ല പക്ഷേ ഇപ്പൊ ഡിസെംബര്‍ എന്ന് കേള്‍ക്കുമ്പോ ഉള്ള കുളിരുള്ള അനുഭവം ഓര്‍മയായി മാറുന്നു; ഇവിടെ ഡിസെംബര്‍ ചൂട് കാലമാണ്.

എങ്കില്‍ ഈ ചൂടു കാലത്ത് ഒന്ന് കറങ്ങാന്‍ പോണമെന്നൊക്കെ വെച്ചാ, ഇടക്കൊക്കെയുള്ള മഴയും ഒരു രസം കൊല്ലിയാവുന്നു,കഴിഞ്ഞ ആഴ്ച മഴയോടൊപ്പം ആലിപ്പഴവും പെയ്തിരുന്നു, കാണാനും കേള്‍ക്കാനും നല്ല രസമുണ്ടായിരുന്നുവെങ്കിലും ഇന്‍ഷുറന്‍സ് കമ്പനികള്‍ക്ക് 250 മില്ല്യന്‍ ഡോളറായിരുന്നു നഷ്ടം. പിന്നെ ഇന്‍‌ഡ്യയുടെ പ്രാക്ടീസ് മാച്ച് മഴയില്‍ ഒലിച്ച് പോയതു പത്രങ്ങളില്‍ വായിച്ചു കാണുമല്ലൊ, ചുരുക്കിപ്പറഞ്ഞാല്‍ മോഹങ്ങളും മോഹഭംഗങ്ങളും ഒന്നിനോടൊന്നു ചേര്‍ന്ന് ജീവിതം ഇങ്ങനെ ഒഴുകുന്നു. എങ്കിലും എന്നത്തെയും പോലും ഇപ്പോഴും ഞങ്ങള്‍ ഹാപ്പിയാണ്.

മറ്റ് വിശേഷങ്ങള്‍ ഒന്നുമില്ല, ബാക്കി പിന്നീട്, മറുപടി പ്രതീക്ഷിച്ചുകൊണ്ട് തല്‍‌ക്കാലം നിര്‍ത്തട്ടെ !

സ്നേഹപൂര്‍വം സാജന്‍.


എല്ലാ ബ്ലോഗേഴ്സിനും അവരുടെ കുടുംബാംഗങ്ങള്‍ക്കും ഒരിക്കല്‍ കൂടെ സന്തോഷത്തിന്റേയും സമാധാനത്തിന്റേയും ക്രിസ്മസ്സ് പുതുവത്സാരാശംസകള്‍!!!

മലയാളം ബ്ലോഗര്‍ മന്ത്രിയായാല്‍!

ഫുഡ് ആന്‍ഡ് സിവില്‍ സപ്ലൈസ് മന്ത്രി ശ്രീ സി ദിവാകരന്‍ പ്രസംഗമദ്ധ്യേ പറഞ്ഞുപോയ ഒരു വാചകത്തിന്റെ അലകള്‍ ഇനിയും ശമിച്ചിട്ടില്ലല്ലോ .ബ്ലോഗില്‍ ഈ വിഷയത്തേ പറ്റി കുറഞ്ഞത് ഒരു അഞ്ചു തവണയെങ്കിലും പോസ്റ്റുകളും അനുബന്ധ ചര്‍ച്ചകളും ഉണ്ടായി. അതില്‍ മിക്ക പോസ്റ്റുകളിലൂ‍ടെ കയറിയിറങ്ങിപ്പോയ ഞാന്‍ ശ്രദ്ധിച്ച ഒരുകാര്യം എല്ലാവരും അദ്ദേഹത്തെ അപലപിച്ചു കണ്ടു, എന്നാല്‍ പകരം മന്ത്രി എന്തായിരിക്കണം പറയേണ്ടത് എന്ന് ആരും എഴുതിക്കണ്ടില്ല.


രണ്ട് വര്‍ഷത്തിനുമുമ്പ് പത്ത് രൂപ അമ്പത് പൈസയുണ്ടാര്‍ന്ന ഒരു കിലോ അരി ഇപ്പോ പത്തൊമ്പത് മുതല്‍ ഇരുപത്തിരണ്ട് രൂപവരെ വില വര്‍ദ്ധിച്ചപ്പോള്‍ എല്ലാ പ്രശ്നങ്ങള്‍ക്കും ഭരിക്കുന്ന സര്‍ക്കാരിനെ പ്രതിക്കൂട്ടില്‍ നിര്‍ത്താതെ, ഒരു ബദല്‍ ഭക്ഷണത്തെ പറ്റി എന്തുകൊണ്ട് നമുക്കൊന്നു ചിന്തിച്ചുകൂടാ?

ഒരു നിമിഷം, താങ്കളായിരുന്നു മന്ത്രി സി ദിവാകരന്റെ സ്ഥാനത്തെങ്കില്‍ എന്തായിരിക്കും പകരം നിര്‍ദ്ദേശിക്കുമായിരുന്നത് ഒന്നു ചിന്തിച്ചു നോക്കുന്നത് കൊണ്ട് പ്രത്യേകിച്ചു കുഴപ്പമൊന്നും വരാനില്ലെങ്കില്‍ ഒരു അഭിപ്രായം എഴുതാമോ, ആര്‍ക്കറിയാം ഒരുപക്ഷേ നമ്മുടെ നാടിന്റെ ഭക്ഷ്യസംസ്ക്കാരം തന്നെ താങ്കളുടെ ഒറ്റ വാചകം കൊണ്ട് മാറിപ്പോയാലോ? ചുമ്മാ ഒന്നു ട്രൈ ചെയ്യൂന്നേ:)

(ചിത്രം കടപ്പാട്: കേരളാ കൌമുദി വെബ് എഡിഷന്‍)

ഈ സ്ത്രീ ബ്ലോഗര്‍ ആര്?

ലാവിഷായി ഒരു കുപ്പി കള്ളും മോന്തി കൂട്ടത്തില്‍ ടച്ചിങ്ങ്സിനായി കരിമീന്‍ ഫ്രൈ വാങ്ങിക്കഴിച്ചിട്ട്
നല്ല ഒരു തുക ബില്ലും അടച്ച് അത്ര ചെറുതല്ലാത്ത ടിപ്പും കൊടുത്ത് ബാക്കി പൈസ ബാഗിലിട്ട് ഇതൊക്കെയും ആരെങ്കിലും കണ്ടോ എന്ന് തിരിഞ്ഞു നോക്കി വരുന്ന ഈ മഹിളാരത്നം ആരെന്ന് പറയാമോ? ക്ലൂ: അറിയണമെന്നാശയുള്ളവര്‍ പഴയസിനിമാപ്പാട്ടുകള്‍ ഓരോന്നായി മൂളിനോക്കൂ